சென்னை ஆக்கி சங்கம் சார்பில் ஸ்ரீராம் சிட்டி ஆதரவுடன் ‘சூப்பர் சிக்ஸ்’ ஆக்கி லீக் சாம்பியன்ஷிப் போட்டி எழும்பூரில் உள்ள மேயர் ராதாகிருஷ்ணன் ஸ்டேடியத்தில் இன்று (ஞாயிற்றுக்கிழமை) முதல் 31-ந் தேதி வரை நடக்கிறது. இதில் ஐ.சி.எப்., இந்தியன் ஓவர்சீஸ் வங்கி, இந்தியன் வங்கி, மத்திய கலால் வரி, தெற்கு ரெயில்வே, சாய் ஆகிய 6 அணிகள் கலந்து கொண்டு மோதுகின்றன. ஒவ்வொரு அணியும் மற்ற அணியுடன் தலா ஒரு முறை மோத வேண்டும். லீக் முடிவில் முதலிடத்தை பிடிக்கும் அணிக்கு சாம்பியன் கோப்பையுடன் ரூ.80 ஆயிரம் ரொக்கப்பரிசு அளிக்கப்படும். 2-வது இடம் பிடிக்கும் அணிக்கு ரூ.60 ஆயிரம் பரிசாக கிடைக்கும். இதுதவிர சிறந்த வீரர்களுக்கும் ரொக்கப்பரிசு வழங்கப்படும். இன்று மாலை 4 மணிக்கு நடைபெறும் தொடக்க லீக் ஆட்டத்தில் இந்தியன் வங்கி-சாய் அணிகள் மோதுகின்றன. தொடக்க விழாவில் ஸ்ரீராம் சிட்டி துணைத்தலைவர் எஸ்.ராஜேந்திரன் கலந்து கொண்டு போட்டியை தொடங்கி வைக்கிறார். இந்த தகவலை சென்னை ஆக்கி சங்க செயலாளர் எம்.எஸ்.உதயகுமார் தெரிவித்துள்ளார்.