கோடை காலம் என்றாலே மாம்பழ சீசன்தான். இந்த விடுமுறையில் அசத்தலான மாங்காய் தொக்கு ரெசிபியை உங்கள் குழந்தைகளுக்கு சமைத்து கொடுங்கள். இது சாதம், இட்லி, தோசை என அனைத்துக்கும் சூப்பர் சைட்டீஷ் ஆக இருக்கும்..சுவையான மாங்காய் தொக்கு எப்படி செய்வது என்பதை பார்க்கலாம்!

தேவையான பொருட்கள்: புளிப்பில்லாத மாங்காய் – 3, காய்ந்த மிளகாய் – 12, வெந்தயம், கடுகு – 2 டீஸ்பூன், மஞ்சள்தூள் – ஒரு டீஸ்பூன், வெல்லம் பொடித்தது – 2 ஸ்பூன், பெருங்காயம் – அரை டீஸ்பூன், நல்லெண்ணெய் – 100 கிராம், உப்பு – தேவையான அளவு,

செய்முறை: வாணலியில் ஒரு டீஸ்பூன் எண்ணெய் விட்டு மிளகாயை வறுத்து, பிறகு வெந்தயம், கடுகை வறுத்து, மிக்ஸியில் நைஸாகப் பொடிக்கவும்.

பின்னர் வாணலியில் 5 டேபிள்ஸ்பூன் எண்ணெய் விட்டு மாங்காயைத் தோல் சீவி, மெலிதாக நறுக்கிப் போட்டு வதக்கவும். மஞ்சள்தூள் சேர்த்து, மாங்காய் நன்றாக வெந்ததும் வெல்லத்தைச் சேர்க்கவும்.

வறுத்து அரைத்த பொடி, பெருங்காயம் இவற்றைச் சேர்த்து நன்றாகக் கலந்து இறக்கவும். சூடாக இருக்கும்போதே மீதியுள்ள எண்ணெயைச் சேர்த்தால் அசத்தலான மாங்காய் தொக்கு தயார்!!