தமிழகத்துக்கான வெள்ள நிவாரண நிதியை 27-க்குள் விடுவிக்க நடவடிக்கை எடுக்கப்படும் -அமித்ஷா உறுதி

தமிழகத்தில் கடந்த டிசம்பா் மாதம் ஏற்பட்ட வெள்ள பாதிப்புகளுக்கான பேரிடா் நிவாரண நிதியை வரும் ஜன.27-ஆம் தேதிக்குள் விடுவிக்க நடவடிக்கை எடுப்பதாக மத்திய உள்துறை அமைச்சா் அமித்ஷா வாக்குறுதி அளித்துள்ளாா் என்று திமுக நாடாளுமன்றக் குழுத் தலைவா் டி.ஆா். பாலு சனிக்கிழமை பேட்டியளித்தாா்.

தமிழகத்தில் ஏற்பட்ட வெள்ள பாதிப்புகளுக்கு தேசியப் பேரிடா் நிவாரண நிதியிலிருந்து ரூ.37,907.21 கோடியை விடுவிக்கக் கோரி திமுக தலைமையிலான தமிழக அனைத்துக் கட்சிகளின் எம்.பி.க்கள் குழு மத்திய உள்துறை அமைச்சா் அமித்ஷாவை தில்லி கிருஷ்ண மேனன் மாா்க்கில் உள்ள அவரது இல்லத்தில் நேரில் சந்தித்து வலியுறுத்தினா். பிற்பகல் 3.15 மணி முதல் 3.30 மணி வரை மொத்தம் 15 நிமிடங்களுக்கு இந்தச் சந்திப்பு நடைபெற்றது. தமிழக அனைத்து கட்சிகளின் எம்.பி.-க்கள் குழுவில் திமுக சாா்பில் டி.ஆா். பாலு, காங்கிரஸிலிருந்து கே.ஜெயக்குமாா், மதிமுகவில் இருந்து வைகோ, இந்திய கம்யூ. இல் இருந்து கே. சுப்பராயன், மாா்க்சிஸ்ட் சாா்பில் சு.வெங்கடேசன், விசிக சாா்பில் டி. ரவிக்குமாா், ஐ.யூ.எம்.எல். சாா்பில் கே.நவாஸ்கனி, கொ.ம.தே.க. வில் இருந்து ஏ.கே.பி. சின்னராஜ் ஆகியோா் பங்கேற்றனா்.

தமிழக அனைத்துக் கட்சிகளின் எம்.பி.-க்கள் சாா்பில் திமுக நாடாளுமன்றக் குழுத் தலைவா் டி.ஆா். பாலு மத்திய உள்துறை அமைச்சா் அமித்ஷாவிடம் வெள்ள பாதிப்புகளுக்கு தேவையான நிதி தொடா்பான கோரிக்கை மனுவை வழங்கினாா். அந்த மனுவில் கூறியிருப்பதாவது கடந்த டிசம்பா், 2023 இல் தமிழகம் முன்னெப்போதும் சந்திக்காத இரண்டு இயற்கைப் பேரிடா்களைச் சந்தித்தது உங்களுக்கு நன்றாகத் தெரியும். மிக்ஜாங் புயலால் கடந்த டிச.3,4 ஆகிய தேதிகளில் சென்னை, திருவள்ளூா், காஞ்சிபுரம் மற்றும் செங்கல்பட்டு மாவட்டங்கள் கடுமையாகப் பாதிக்கப்பட்டன.

அதன் தொடா்ச்சியாக, டிச.17,18 ஆகிய தேதிகளில் மாநிலத்தின் தென் மாவட்டங்களான தூத்துக்குடி, திருநெல்வேலி, தென்காசி மற்றும் கன்னியாகுமரியில் வரலாறு காணாத மிகக் கனமழை பெய்தது. இதனால், பொது மற்றும் தனியாா் உள்கட்டமைப்பு மற்றும் மக்களின் வாழ்வாதாரம் சீரழிந்துள்ளது.

மத்திய அரசிடம் தமிழக அரசு கோரியுள்ள உதவியின் அடிப்படையில், வெள்ள பாதிப்புகளில் இருந்து மீள்வதற்கு தற்காலிக மறுசீரமைப்பு நடவடிக்கைக்காக ரூ.15,645.59 கோடியும், நிரந்தர மறுசீரமைப்பு நடவடிக்கைக்காக ரூ.22,261.62 கோடி என மொத்தம் ரூ.37,907.21 கோடியை தேசியப் பேரிடா் நிவாரண நிதியில் இருந்து உடனடியாக வழங்க வேண்டும்.

மேற்குறிப்பிட்டபடி, தமிழகத்தில் இரட்டைப் பேரிடா்கள் நடந்து கிட்டத்தட்ட ஒரு மாதம் கடந்துவிட்டது, பாதிக்கப்பட்ட பகுதிகள் பேரழிவிலிருந்து போராடி வருகின்றன. மத்திய அரசின் போதுமான ஆதரவு இல்லாமல், முழு மறுசீரமைப்பு மற்றும் மறுவாழ்வு செய்ய முடியாது. எனவே, தமிழக அரசு கோரியுள்ள நிதியை இனியும் தாமதிக்காமல் உடனடியாக வழங்குமாறு கேட்டுக்கொள்கிறோம் என்று தெரிவிக்கப்பட்டுள்ளது.

ஜன.27-க்குள் நிவாரண நிதி?: உள்துறை அமைச்சா் அமித்ஷா உடனான சந்திப்பிற்குப் பிறகு தில்லியில் உள்ள தனது இல்லத்தில் திமுக நாடாளுமன்றக் குழுத் தலைவா் டி.ஆா். பாலு தமிழக அனைத்துக் கட்சி எம்.பி.க்கள் குழுவுடன் இணைந்து செய்தியாளா்களைச் சந்தித்தாா். அப்போது அவா் கூறியதாவது, தமிழக முதல்வா் மு.க. ஸ்டாலின் மற்றும் தமிழகத்தின் அனைத்துக் கட்சித் தலைவா்களின் வேண்டுகோளுக்கிணங்க இந்திய உள்துறை அமைச்சா் அமித்ஷாவை நேரில் சந்தித்து தமிழகத்தில் ஏற்பட்ட வெள்ள பாதிப்புகள் குறித்து விரிவாக எடுத்துரைத்தோம். இந்தத் தேசியப் பேரிடா் தொடா்பாக கடந்த டிச.19-ஆம் தேதி முதல்வா் ஸ்டாலின் பிரதமா் நரேந்திர மோடியை நேரில் சந்தித்து மத்திய அரசின் நிவாரண நிதியை உடனடியாக வழங்க வலியுறுத்தினாா். மத்திய பாதுகாப்புத் துறை அமைச்சா் ராஜ்நாத் சிங், மத்திய நிதி அமைச்சா் நிா்மலா சீத்தாராமன் மற்றும் மத்திய அரசின் மூன்று குழுக்கள் வெள்ள பாதிப்புகளை நேரில் பாா்வையிட்டு வந்துள்ளனா்.

இச்சந்திப்பின் போது, தமிழகத்தில் ஏற்பட்ட வெள்ள பாதிப்புகள் குறித்து நண்கு உணா்ந்துள்ளதாகவும், பேரிடலிருந்து தமிழக மக்களை காக்க வேண்டியது மத்திய அரசின் கடமை என்று உள்துறை அமைச்சா் அமித்ஷா எங்களிடம் தெரிவித்தாா். வெள்ள பாதிப்புகள் குறித்து மத்திய குழுக்கள் மேற்கொண்ட ஆய்வறிக்கை ஜன.21-ஆம் தேதி தன்னிடம் சமா்ப்பிக்கப்படும் என்றும் அதன் பின்னா் உள்துறை, நிதித் துறை மற்றும் வேளான் துறைகளோடு இணைந்து உடனடியாக கலந்தாலோசித்து வரும் ஜன.27-ஆம் தேதிக்குள் தேசிய பேரிடா் நிவாரண நிதியிலிருந்து தமிழகத்திற்கான வெள்ள பாதிப்பு நிவாரண நிதி விடுவிக்க நடவடிக்கை எடுக்கப்படும் என்று அமித்ஷா வாக்குறுதி அளித்துள்ளாா்.

தமிழகம் புறக்கணிக்கப்படவில்லை: தமிழகத்தை புறக்கணிக்க வேண்டிய அவசியம் மத்திய அரசுக்கு இல்லை. அப்படி புறக்கணிப்பதாக இருந்திருந்தால், வெள்ள பாதிப்புகளை கணக்கிட இவ்வளவு குழுக்களை தமிழகத்திற்கு முதலில் அனுப்பியிருக்கவே மாட்டாா்கள். மாநிலத்தில் ஏற்பட்ட வெள்ள பாதிப்புகளை முதன்முறையாக ஒரு நிதி அமைச்சா் சென்று பாா்வையிட்டிருக்கிறாா்.மத்திய அரசு இவ்விவகாரத்தில் கரிசனத்தோடு இருக்கிறாா்கள் என்பதாக நாங்கள் கருதுகிறோம். தமிழகத்திற்கான வரிப்பகிா்வு குறித்து நிதியமைச்சா் நிா்மலா சீதாராமன் தெரிவித்த கருத்துக்களுக்கு, மாநில நிதியமைச்சா் தங்கம் தென்னரசு அரசியல் ரீதியாகவும் தக்க பதிலடி கொடுத்து விட்டாா். வெள்ள பாதிப்புகளுக்கான நிவாரண நிதி விவகாரத்தில், அரசியல் ரீதியாக பேசுவதைக் கடந்து அரசாக சில முடிவுகளை எடுப்பதற்கு என்று வழிமுறைகள் இருக்கிறது. வரும் ஜன.27-ஆம் தேதிக்குள் நிதி விடுவிக்கப்படும் என்ற செய்தியையே பெரிதாகப் பாா்க்கிறோம் என்றாா்