உடல் எடையை குறைக்க நினைப்பவர்கள் இந்த கொள்ளு சூப்பை தினமும் குடித்து வரலாம். இதை எப்படி செய்வது என்று பார்க்கலாம்.

தேவையான பொருட்கள் :

கொள்ளு – அரை கப்
தக்காளி – 3
எலுமிச்சம்பழச்சாறு – அரை டேபிள் ஸ்பூன்
கொத்தமல்லித்தழை – சிறிதளவு
உப்பு – சுவைக்கேற்ப
எண்ணெய் – 2 டீ ஸ்பூன்

பொடிக்க :

மிளகு – ஒரு டீஸ்பூன்
சீரகம் – ஒரு டீஸ்பூன்
பூண்டு – 2 பல்
கறிவேப்பிலை – சிறிது

செய்முறை :

* கொத்தமல்லி, தக்காளியை பொடியாக நறுக்கி கொள்ளவும்.

* முதல் நாள் இரவே கொள்ளை ஊறவைத்து, மறுநாள் 3 கப் தண்ணீரை சேர்த்து குக்கரில் வேகவிடுங்கள். பிறகு தண்ணீரை வடித்து எடுத்துக்கொள்ளுங்கள்.

* மிளகு, சீரகத்தை நன்கு மைய அரைத்து பூண்டு, கறிவேப்பிலை சேர்த்துத் தட்டியெடுத்து கொள்ளவும்.

* கடாயை அடுப்பில் வைத்து எண்ணெய் ஊற்றி சூடானதும் பொடியாக நறுக்கிய தக்காளியைச் சேருங்கள். அத்துடன் சிறிது உப்பு சேர்த்து 2 நிமிடம் வதக்கி, அரைத்த விழுது சேர்த்து இன்னும் 3 நிமிடம் வதக்குங்கள்.

* பின் கொள்ளு வேகவைத்த தண்ணீரையும், தேவையான உப்பையும் சேர்த்து 5 நிமிடம் கொதிக்கவிட்டு இறக்குங்கள்.

* வடிகட்டி எலுமிச்சம்பழச் சாறு, கொத்தமல்லித்தழை, மிளகு தூள் சேர்த்து பரிமாறுங்கள்.

* சத்தான கொள்ளு சூப் ரெடி.