சாம்பியன்ஸ் டிராபி தொடருக்கான பயிற்சி ஆட்டத்தில் வங்கதேச அணியை 240 ரன்கள் வித்தியாசத்தில் இந்திய அணி வென்றது.

லண்டன் ஓவல் மைதானத்தில் நடைபெற்ற இந்த ஆட்டத்தில் முதலில் பேட் செய்த இந்திய அணி 50 ஓவர்களில் 7 விக்கெட்கள் இழப்புக்கு 324 ரன்கள் குவித்தது. தொடக்க வீரரான ரோஹித் சர்மா 1 ரன்னில் ரூபல் ஹொசைன் பந்திலும், அடுத்து களமிறங்கிய ரஹானே 11 ரன்களில் முஸ்டாபிஸூர் ரஹ்மான் பந்திலும் போல்டானார்கள்.

21 ரன்களுக்கு 2 விக்கெட்களை இழந்த நிலையில் ஷிகர் தவணுடன் இணைந்த தினேஷ் கார்த்திக் அற்புதமாக பேட் செய்தார். இருவரும் நிதானமாக விளையாடி அரை சதம் அடித்தனர். ஷிகர் தவண் 67 பந்துகளில், 7 பவுண்டரிகளுடன் 60 ரன்கள் எடுத்த நிலையில் இஸ்லாம் பந்தில் ஆட்டமிழந்தார். இந்த ஜோடி 3-வது விக்கெட்டுக்கு 100 ரன்கள் சேர்த்தது.

இதையடுத்து களமிறங்கிய கேதார் ஜாதவ் 31 ரன்களில் இஸ்லாம் பந்தில் போல்டானார். சிறப்பாக விளையாடிய தினேஷ் கார்த்திக் 77 பந்துகளில், ஒரு சிக்ஸர், 8 பவுண்டரிகளுடன் 94 ரன்கள் குவித்த நிலையில் ரிட்யர்டு முறையில் வெளியேறினார். அடுத்து களமிறங்கிய ஜடேஜா 32, அஸ்வின் 5 ரன்களில் வெளியேறினர்.

கடைசி கட்டத்தில் ஹர்திக் பாண்டியா 54 பந்துகளில், 4 சிக்ஸர்கள், 6 பவுண்டரிகளுடன் 80 ரன்கள் விளாச இந்திய அணி பெரிய அளவிலான இலக்கை கொடுத்தது. வங்கதேச அணி தரப்பில் ரூபல் ஹொசைன் 3, இஸ்லாம் 2 விக்கெட்கள் கைப்பற்றினர். இதையடுத்து 325 ரன்கள் இலக்குடன் பேட் செய்த வங்கதேச அணி புவனேஷ்வர் குமார், உமேஷ் யாதவ் ஆகியோரது பந்து வீச்சில் ஆட்டம் கண்டது. அந்த அணி 22 ரன்களை சேர்ப்பதற்குள் 6 விக்கெட்களை தாரை வார்த்தது.

இம்ருல் கெய்ஸ் 7, சவுமியா சர்க்கார் 2, சபிர் ரஹ்மான் 0, ஷாகிப் அல்-ஹசன் 7, மஹ்மதுல்லா 0, மொசடக் ஹொசைன் 0 ரன்களில் ஆட்டமிழந்தனர். அடுத்து களமிறங்கிய முஸ்பிகுர் ரஹிம் 13 ரன்கள் எடுத்த நிலையில் முகமது ஷமி பந்தில் வெளியேறினார்.

தொடர்ந்து களமிறங்கிய மெகதி ஹசன் மிராஸ் 24, இஸ்லாம் 18, ரூபல் ஹொசைன் 0 ரன்களில் நடையை கட்ட வங்கதேச அணி 23.5 ஓவர்களில் 84 ரன்களுக்கு சுருண்டது. இந்திய அணி தரப்பில் புவனேஷ்வர் குமார், உமேஷ் யாதவ் ஆகியோர் தலா 3 விக்கெட்களும் பும்ரா, ஹர்திக் பாண்டியா, முகமது ஷமி, அஸ்வின் ஆகியோர் தலா ஒரு விக்கெட்டும் கைப்பற்றினர்.