மறைந்த முன்னாள் பிரதமர் வாஜ்பாய்க்கு புகழ் அஞ்சலி கூட்டம் இன்று (செவ்வாய்க்கிழமை) மாலை 4 மணிக்கு சென்னை எழும்பூரில் உள்ள ராணி மெய்யம்மை அரங்கத்தில் நடைபெறுகிறது.

கூட்டத்திற்கு பா.ஜ.க. மாநில தலைவர் டாக்டர் தமிழிசை சவுந்தரராஜன் தலைமை தாங்குகிறார். இதில் தமிழக அரசியல் கட்சி தலைவர்கள் கலந்துகொண்டு வாஜ்பாய்க்கு புகழ் அஞ்சலி செலுத்தி உரையாற்ற இருக்கிறார்கள்.

பா.ஜ.க. சார்பில் மத்திய மந்திரிகள் பிரகாஷ் ஜவடேகர், பொன்.ராதாகிருஷ்ணன் ஆகியோரும், அ.தி.மு.க. சார்பில் அமைச்சர் டி.ஜெயக்குமாரும், காங்கிரஸ் சார்பில் தமிழ்நாடு காங்கிரஸ் தலைவர் சு.திருநாவுக்கரசரும், தி.மு.க. சார்பில் மகளிரணி செயலாளர் கனிமொழி எம்.பி.யும் கலந்துகொண்டு பேசுகிறார்கள்.

இல.கணேசன்

இதேபோல், பா.ம.க. சார்பில், அக்கட்சியின் தலைவர் ஜி.கே.மணியும், விடுதலை சிறுத்தைகள் கட்சி சார்பில் அதன் தலைவர் தொல்.திருமாவளவனும், புதிய தமிழகம் கட்சி சார்பில் அதன் நிறுவன தலைவர் டாக்டர் கிருஷ்ணசாமியும், தமிழ் மாநில காங்கிரஸ் கட்சி சார்பில், கட்சியின் மூத்த துணைத்தலைவர் பி.எஸ்.ஞானதேசிகனும் பங்கேற்று உரையாற்றுகிறார்கள்.

மேலும், இந்திய யூனியன் முஸ்லிம் லீக் கட்சியின் பொதுச்செயலாளர் முகமது அபுபக்கர் எம்.எல்.ஏ., இந்திய ஜனநாயக கட்சியின் நிறுவனத்தலைவர் பாரிவேந்தர், இந்திய மக்கள் கல்வி முன்னேற்ற கழக தலைவர் டி.தேவநாதன் யாதவ், புதிய நீதிக்கட்சி தலைவர் ஏ.சி.சண்முகம், ம.தி.மு.க. துணை பொதுச் செயலாளர் மல்லை சத்யா, இந்திய கம்யூனிஸ்டு மாநில துணை செயலாளர் மு.வீரபாண்டியன், மார்க்சிஸ்ட் கம்யூனிஸ்டு மத்திய குழு உறுப்பினர் பி.சம்பத், லோக் ஜனசக்தி தலைவர் ச.வித்யாதரன் ஆகியோரும் கலந்துகொண்டு பேசுகிறார்கள்.

இறுதியாக பா.ஜ.க. மூத்த தலைவர் இல.கணேசன் பேசுகிறார்.