தலைநகர் டெல்லியில் இன்று பல இடங்களில் அதிகாலை மழை பெய்தது. இதனால், காலை வேளையிலேயே டெல்லி நகர் குளிர்ந்ததோடு, இதமான சூழல் காணப்பட்டது. இருப்பினும், கனமழையால், சாலைகளில் குளம் போல் நீர் தேங்கியதால், கடும் போக்குவரத்து நெரிசல் ஏற்பட்டது. மழை நீர் ஆங்காங்கே தேங்கி கிடந்ததால், பாதசாரிகளும் கடும் சிரமத்திற்குள்ளாகினர்.

கனமழை காரணமாக சில இடங்களில் மின்விநியோகமும் நிறுத்தப்பட்டது. மேலும், போக்குவரத்து நெரிசலில் சிக்கி தவிக்காமல் செல்வதற்காக சில சாலைகளை வாகன ஓட்டிகள் தவிர்க்குமாறும் டெல்லி போக்குவரத்து போலீசார் அறிவுறுத்தினர். சென்ட்ரல் டெல்லியில் உள்ள பிரதான சாலைகளில் வாகனங்கள் நத்தை போல் ஊர்ந்து செல்வதை காண முடிந்தது.

டுவிட்டரில் டெல்லிரெயின்ஸ் என்ற ஹேஷ்டேக்கை உருவாக்கி டெல்லிவாசிகள் இன்று மழை தொடர்பான புகைப்படங்களையும் வீடியோக்களையும் அதிக அளவு பதிவிட்டு வருவதை காண முடிந்தது. இன்று மிதமான மழை பெய்யக்கூடும் என்று வானிலை ஆய்வு மையம் தெரிவித்துள்ளது.