நாடாளுமன்ற தேர்தலில் அசாம் மாநிலத்தில் 4 தொகுதிகளில் மூன்றாவது கட்ட தேர்தல் நேற்று நடந்தது. முன்னாள் பிரதமரும் காங்கிரஸ் மூத்த தலைவருமான மன்மோகன் சிங், அசாம் மாநிலத்தில் இருந்து நாடாளுமன்ற மாநிலங்களவைக்கு தேர்ந்தெடுக்கப்பட்டவர் ஆவார்.

அவருக்கும், அவருடைய மனைவிக்கும் அசாமில், கவுகாத்தி நாடாளுமன்ற தொகுதிக்கு உட்பட்ட திஸ்பூர் சட்டசபை தொகுதியில்தான் ஓட்டு உள்ளது.

இந்த நிலையில் நாடாளுமன்ற தேர்தலில் ஓட்டுப்பதிவு செய்வதற்காக மன்மோகன் சிங், மனைவி குர்சரண் கவுருடன் டெல்லியில் இருந்து விமானம் மூலம் கவுகாத்திக்கு வந்தார். அங்குள்ள வீட்டில் சிறிது நேரம் ஓய்வு எடுத்தார்.

அதைத் தொடர்ந்து கவுகாத்தியில் திஸ்பூர் அரசு மேல்நிலைப்பள்ளியில் அமைக்கப்பட்டிருந்த வாக்குச்சாவடிக்கு அவர், மனைவியுடன் வந்து ஓட்டுப்பதிவு செய்தார். அதைத் தொடர்ந்து அவர் அங்கு புகைப்பட கலைஞர்களுக்கும், டி.வி. கேமராமேன்களுக்கும் ‘போஸ்’ கொடுத்தார். 2009, 2014 நாடாளுமன்ற தேர்தல்கள் மற்றும் 2016 சட்டசபை தேர்தலிலும் மன்மோகன் சிங் அசாம் வந்து ஓட்டுப்பதிவு செய்தது நினைவுகூரத்தக்கது.