ஐபிஎல் தொடரில் இன்று மாலை 4 மணிக்கு கான்பூரில் நடைபெறும் ஆட்டத்தில் நடப்பு சாம்பியனான சன் ரைசர்ஸ் ஹைதராபாத், குஜராத் லயன்ஸ் அணியுடன் மோதுகிறது.

டேவிட் வார்னர் தலைமை யிலான ஹைதராபாத் அணி 13 ஆட்டத்தில் விளையாடி 7 வெற்றி, 5 தோல்வி, ஒரு ஆட்டம் முடிவில்லாத நிலையில் 15 புள்ளிகள் பெற்று பட்டியலில் 4-வது இடத்தில் உள்ளது. இந்த சீசனில் ஹைதராபாத் அணிக்கு இதுதான் கடைசி லீக் ஆட்டம்.

இந்த ஆட்டத்தில் வெற்றி பெற்றால் மட்டுமே பிளே ஆப் சுற்றுக்கு முன்னேற முடியும் என்ற நெருக்கடியில் உள்ளது ஹைதராபாத் அணி. டெல்லி, புனே அணிகளுக்கு எதிரான ஆட்டத்தில் அடுத்தடுத்து தோல்விகளை சந்தித்த ஹைதராபாத் அணி தனது கடைசி ஆட்டத்தில் வலுவான மும்பை அணியை வீழ்த்தியி ருந்தது.

இன்றைய ஆட்டத்தில் ஹைதராபாத் அணி தோல்வியை சந்தித்தால் அந்த அணி பிளே ஆப் சுற்றுக்கு முன்னேறும் வாய்ப் புக்காக, புனே-பஞ்சாப் அணிகள் இடையிலான ஆட்டத்தின் முடிவுக்கு காத்திருக்க வேண்டும்.

14 புள்ளிகள் பெற்றுள்ள பஞ்சாப் அணி தனது கடைசி ஆட்டத்தில் நாளை புனேவை எதிர்த்து விளையாடுகிறது. இந்த ஆட்டத்தில் புனே அணி பஞ்சாப் அணியை வீழ்த்தினால் மட்டுமே ஹைதராபாத் அணியால் பிளே ஆப் சுற்றில் கால்பதிக்க முடியும்.

குஜராத் அணியுடன் ஒப்பிடும் போது ஹைதராபாத் அணி பேட்டிங், பந்து வீச்சில் பலமாகவே உள்ளது. வார்னர் 535 ரன்களும், ஷிகர் தவண் 450 ரன்களும் குவித்து இந்த சீசனில் அதிக ரன்கள் குவித்தவர்களின் பட்டியலில் முதல் இரு இடங்களில் உள்ளனர்.

இதேபோல் பந்து வீச்சில் புவனேஷ்வர் குமார் 23 விக்கெட்கள் கைப்பற்றி முதலிடம் வகிக்கிறார். இவருக்கு உறுதுணையாக செயல்பட்டு வரும் சித்தார்த் கவுல் 15 விக்கெட்களும், ரஷித் கான் 14 விக்கெட்களும் வீழ்த்தியுள்ளனர்.

குஜராத் அணிக்கும் இதுதான் கடைசி லீக் ஆட்டம். அந்த அணி 13 ஆட்டத்தில் 4 வெற்றி, 9 தோல்விகளுடன் பட்டியலில் 7-வது இடத்தில் உள்ளது. பிளே ஆப் சுற்றுக்கு முன்னேறும் வாய்ப்பை எப்போதோ இழந்துவிட்ட அந்த அணி ஆறுதல் வெற்றியுடன் இந்த சீசனை முடிக்க முயற்சிக்கக்கூடும்.

வலுவான பேட்டிங் வரிசையுடன் பெரிய அளவில் ரன்களை குவித்தும் மோசமான பந்து வீச்சால் பல ஆட்டங்களில் குஜராத் அணி தோல்வியை சந்தித்தது. பாசில் தம்பி மட்டுமே பந்து வீச்சில் நம்பிக்கை அளிப்பவராக உள்ளார். ஆல்ரவுண்டர்களான ஜடேஜா, பாக்னர் ஆகியோர் இந்த சீசனில் பெரிய அளவில் தாக்கத்தை ஏற்படுத்த தவறினர். இன்றைய ஆட்டத்தில் ரெய்னா, ஆரோன் பின்ச், தினேஷ் கார்த்திக் ஆகியோர் அதிரடியில் மிரட்டக்கூடும்.

அணிகள் விவரம்

சன் ரைசர்ஸ் ஹைதராபாத்:

டேவிட் வார்னர் (கேப்டன்), தன்மே அகர்வால், வில்லியம்சன், யுவராஜ் சிங், ரிக்கி புயி, பிபுல் சர்மா, பென் கட்டிங், ஷிகர் தவண், திவேதி, மொயிசஸ் ஹென்ரிக்ஸ், தீபக் ஹூடா, கிறிஸ் ஜோர்டான், சித்தார்த் கவுல், புவனேஷ்வர் குமார், பென் லாக்லின், அபிமன்யு மிதுன், முகமது நபி, முகமது சிராஜ், முஸ்டாபிஜூர் ரஹ்மான், ஆஷிஸ் நெஹ்ரா, நமன் ஓஜா, ரஷித் கான், விஜய் சங்கர், பரிந்தர் ஷரன், பிரவீண் தாம்பே.

குஜராத் லயன்ஸ்:

சுரேஷ் ரெய்னா (கேப்டன்), பிரண்டன் மெக்கலம், டுவைன் ஸ்மித், ஆகாஷ்தீப் நாத், சுபர் அகர்வால், பாசில் தம்பி, சிராக் சூரி, ஜேம்ஸ் பாக்னர், ஆரோன் பின்ச், மன்பிரித் கோனி, இஷான் கிஷன், ரவீந்திர ஜடேஜா, ஷதாப் ஜகதி, தினேஷ் கார்த்திக், ஷிவில் கவுசிக், தவால் குல்கர்னி, பிரவீன் குமார், முனாப் படேல், பிரதாம் சிங், ஜேசன் ராய், பிரதீப் சங்வான், ஜெயதேவ் ஷா, ஷேல்லே சவுர்யா, நது சிங், தேஜாஸ் பரோகா.

இடம்: கான்பூர்

நேரம்: மாலை 4

நேரடி ஒளிபரப்பு: சோனி சிக்ஸ்