இலங்கை கிரிக்கெட் அணியின் முன்னணி சுழற்பந்து வீச்சாளராக வலம் வந்த 34 வயதான அஜந்தா மென்டிஸ் எல்லா வகையிலான கிரிக்கெட் போட்டிகளில் இருந்தும் ஓய்வு பெறுவதாக நேற்றிரவு அறிவித்தார். 2008-ம் ஆண்டு சர்வதேச கிரிக்கெட்டுக்குள் அடியெடுத்து வைத்த மென்டிஸ், ‘கேரம்’ வகை சுழல் யுக்தி மூலம் பேட்ஸ்மேன்களை விழிபிதுங்க வைத்தார். 2008-ம் ஆண்டு கராச்சியில் நடந்த இந்தியாவுக்கு எதிரான ஆசிய கோப்பை கிரிக்கெட் இறுதி ஆட்டத்தில் மென்டிஸ் 13 ரன் மட்டுமே விட்டுக்கொடுத்து 6 விக்கெட்டுகளை சாய்த்து அனைவரது கவனத்தையும் ஈர்த்தார். ஒரு நாள் கிரிக்கெட்டில் அதிவேகமாக 50 விக்கெட்டுகளை வீழ்த்தியவர் இவர் தான். இந்த மைல்கல்லை அவர் 19 ஆட்டங்களில் எட்டிப்பிடித்தார்.

கடைசியாக 2015-ம் ஆண்டு டிசம்பர் மாதம் இலங்கை அணிக்காக ஆடினார். 19 டெஸ்டுகளில் 70 விக்கெட்டுகளும், 87 ஒரு நாள் போட்டிகளில் 152 விக்கெட்டுகளும், 20 ஓவர் கிரிக்கெட்டில் 39 ஆட்டங்களில் 66 விக்கெட்டுகளும் கைப்பற்றி இருக்கிறார். மூன்று வடிவிலான போட்டிகளிலும் இன்னிங்சில் 6 விக்கெட் வீழ்த்திய ஒரே பவுலர் என்ற சிறப்பும் மென்டிசுக்கு உண்டு. அடிக்கடி காயமடைந்ததால் அது அவரது கிரிக்கெட் வாழ்க்கைக்கு தொய்வை ஏற்படுத்தியது.