ஆலங்குடி அருகே நெடுவாசலில் ஹைட்ரோகார்பன் திட்டத்துக்கு எதிராக 12வது நாளான நேற்று, பொதுமக்கள் மண்டியிட்டு போராட்டத்தில் ஈடுபட்டனர். புதுக்கோட்டை மாவட்டம் ஆலங்குடி அருகே நெடுவாசல் கிராமத்தில் ஹைட்ரோகார்பன் எடுக்கும் திட்டத்திற்கு எதிர்ப்பு தெரிவித்து கடந்த 12-ம் தேதியன்று 2வது கட்ட போராட்டத்தை பொதுமக்கள் தொடங்கினர். நேற்று 12வது நாளாக நடந்த போராட்டத்தில் மத்திய, மாநில அரசுகளை கண்டித்து கோஷமிட்டனர். மேலும், மாணவர்கள், பொதுமக்கள் மண்டியிட்டு தங்களது எதிர்ப்பு காட்டினார்கள்.

இதுகுறித்து பொதுமக்கள் கூறுகையில், `நாங்கள் 2-ம் கட்டமாக 12 நாட்களாக போராடி வருகிறோம். ஆனால் மத்திய, மாநில அரசுகள் இதுவரை செவிசாய்க்கவே இல்லை. விளைநிலத்தையும் விவசாயத்தையும் பாதிக்கும் இத்திட்டத்தை மத்திய, மாநில அரசுகள் கைவிட வேண்டும். இல்லையெனில், இனிவரும் நாட்களில் எங்கள் போராட்டத்தின் தன்மை அதிகரிக்கும்’ என்று எச்சரித்தனர்.