ரூ.7 கோடி பரிசுத்தொகைக்கான சீன ஓபன் பேட்மிண்டன் போட்டி சாங்ஜோவ் நகரில் நடந்து வருகிறது. இதன் பெண்கள் ஒற்றையர் பிரிவில் நேற்று நடந்த கால்இறுதி ஆட்டம் ஒன்றில் உலக தரவரிசையில் 3-வது இடத்தில் உள்ள இந்திய வீராங்கனை பி.வி.சிந்து, 6-ம் நிலை வீராங்கனையான சென் யுபியை (சீனா) சந்தித்தார். 52 நிமிடம் நடந்த இந்த ஆட்டத்தில் சிந்து 11-21, 21-11, 15-21 என்ற செட் கணக்கில் சென் யுபியிடம் தோல்வி கண்டு வெளியேறினார்.

ஆண்கள் ஒற்றையர் பிரிவில் நடந்த கால்இறுதி ஆட்டம் ஒன்றில் முன்னாள் சாம்பியனான இந்திய வீரர் ஸ்ரீகாந்த் 9-21, 11-21 என்ற நேர்செட்டில் ஜப்பான் வீரர் கென்டோ மெமோட்டாவிடம் அதிர்ச்சி தோல்வி கண்டு ஏமாற்றம் அளித்தார். இந்த வெற்றியை பெற கென்டோவுக்கு 28 நிமிடமே தேவைப்பட்டது. இருவரும் கண்ட தோல்வியின் மூலம் இந்த போட்டி தொடரில் இந்தியாவின் சவால் முடிவுக்கு வந்தது.