திருச்செந்தூர் கோயில் கடற்கரையில் கரை ஒதிங்கியுள்ள ஜெல்லி மீன்களால் பக்தர்களுக்கு மிகப்பெரிய அச்சுறுத்தல் இல்லை – மீன்வளத்துறை இன்ஸ்பெக்டர் சுப்பிரமணியன் தகவல்

திருச்செந்தூர் கோயில் கடற்கரையில் கரை ஒதிங்கியுள்ள ஜெல்லி மீன்களால் பக்தர்களுக்கு மிகப்பெரிய அச்சுறுத்தல் இல்லை என மீன்வளத்துறை இன்ஸ்பெக்டர் சுப்பிரமணியன் தெரிவித்தார்.

திருச்செந்தூர் கோயில் கடற்கரையில் கடந்த சில நாட்களாக ஜெல்லி மீன்கள் கரை ஒதுக்குகின்றன. கடலில் நீராடும் பக்தர்களை கடிப்பதாலோ அல்லது தொடுவதாலோ அலர்ஜி ஏற்பட்டு உடல் அரிப்பு ஏற்படுகிறது. சில பக்தர்களுக்கு பலத்த காயம் ஏற்படுகிறது. இதனால் பக்தர்கள் கடும் அவதிப்படுகின்றனர்.

இதுகுறித்து கோயில் அறங்காவலர் குழு தலைவர் அருள்முருகன் மற்றும் இணை ஆணையர் கார்த்திக் ஆகியோரிடம் கோயில் கடற்கரை பாதுகாப்பு பணியாளர்கள் சிவராஜா மற்றும் பணியாளர்கள் தெரிவித்தனர். இதுகுறித்து அரசு முன்னெச்சரிக்கை நடவடிக்கை எடுக்க வேண்டுமென பக்தர்கள் கோரிக்கை விடுத்தனர். இதனையடுத்து திருச்செந்தூர் கோயில் கடற்கரை பகுதியில் தமிழக மீன்வளம் மற்றும் மீனவர் நலத்துறை அமைச்சர் அனிதா ராதாகிருஷ்ணன் உத்தரவுப்படி தூத்துக்குடி மாவட்ட உதவி இயக்குனர் புஷ்ரா ஷபனம் மேற்பார்வையில் இன்ஸ்பெக்டர் சுப்பிரமணியன், சிவராமகிருஷ்ணன் ஆகியோர் கோயில் கடற்கரையில் ஆய்வு செய்தனர்.

இதுகுறித்து இன்ஸ்பெக்டர் சுப்பிரமணியன் கூறியதாவது:
பொதுவாக ஏப்ரல் மற்றும் மே மாதங்களில் இந்த வகையான செஞ்சொறி மீன்கள் மன்னார் வளைகுடா கடல் பகுதிகளில் கடல் நீரின் திசை மாறுபாட்டிற்கு ஏற்ப காணப்படுகிறது.
இது கொட்டும் தன்மையுடைய ஜெல்லி மீன்களாகும். ஆகையால் நீரில் இருக்கும் போதோ அல்லது கடற்கரை பகுதிகளில் கிடந்தாலோ அவற்றை கையினால் தொடக்கூடாது. அவற்றை அறியாமல் தொடுவதால் ஏற்படும் எரிச்சல் மற்றும் தீக்காயம் போல் ஏற்பட்ட காந்தலை குறைக்க வினிகரை, காயம் ஏற்பட்ட பகுதியில் சுமார் ஒரு நிமிடங்களில் தெளித்து பயன்படுத்தலாம். பின்னர் கலமைன் அல்லது கலட்ரைல் மருந்தினை உடனடியாக பயன்படுத்தினால் 24 மணி நேரத்திற்குள் ஏற்பட்ட காயம் சரியாகிவிடும். இந்த வகை மீன்களால் அச்சுறுத்தல் இல்லை என்று அவர் கூறினார்.